بۇ يىگىت قانداق قىلىپ ب د ت دىكى خەنزۇچە چۈشەندۈرگۈچى بولالىدى؟
0
2019-08-27 16:26:00
|
مەنبەسى:جۇڭگو ئۇيغۇرچە رادىيو تورى
|
تەھرىر :مېھرىگۈل

«ما شاۋفېي» دەپ ئاتىلىدىغان بىر چەتئەللىك بار بولۇپ، بۇ ئىسىم Marsh Oliver دەيدىغان بىر چەتئەللىكنىڭ ئۆزىگە قويۇۋالغان تور ئىسمىدۇر. «90-يىلدىن كېيىن تۇغۇلغان» ئامېرىكىلىق بۇ يەھۇدىي يىگىت، ب د ت نىڭ مېھمانلار مەركىزىدىكى ئانا تىلى خەنزۇ تىلى بولمىغان بىردىنبىر خەنزۇ تىلىدا چۈشەندۈرگۈچىدۇر، شۇنداقلا دۆلەت ئىچىدىكى سوئاللارغا جاۋاب بېرىش سۇپىسى «جىخۇ» دا 20 مىڭدىن ئارتۇق ئەگەشكۈچىسى بار بولغان «تور چولپىنى»دۇر. خەنزۇچىنى قىزغىن سۆيىدىغان «نىيۇيوركلۇق» ما شاۋفېي نىيۇيوركتا تۇغۇلۇپ چوڭ بولغان، ئۇ ئۆزىنىڭ «نىيۇيوركلۇق» سالاھىيىتىدىن پەخىرلىنىدۇ. ئۇ مۇنداق دېدى: « مەن ئىزچىل نىيۇيوركنى يۇرتۇم دەپ قاراپ كەلدىم، مەن بۇ شەھەرنى ناھايىتى ياخشى كۆرىمەن، چۈنكى بۇ يەردە دۇنيانىڭ ھەرقايسى جايلىرىدىن كەلگەن كۆچمەنلەر بار». ئۇ دەل باشقا مىللەتلەرنىڭ مەدەنىيىتى ۋە تۇرمۇش ئۇسۇلىغا قىزىققانلىقتىن، ئامېرىكىنىڭ پىرىنسېتون داشۆسىدە ئوقۇۋاتقان چاغدا شەرقىي ئاسىيا تەتقىقات كەسپىنى تاللىغان ھەمدە خەنزۇ تىلىنى ئۆگىنىشكە باشلىغان. دەسلەپتە، ئۇ پەقەت خەنزۇچە خەتنى ناھايىتى چىرايلىق ھېس قىلغان، لېكىن بىر مەزگىل ئۆگەنگەندىن كېيىن، خەنزۇ تىلىنىڭ ئىنتايىن قىزىقارلىق ئىكەنلىكىنى بايقىغان، ئۇنىڭ ئۈستىگە ئۆگەنگەنسېرى ئۇنىڭدىكى بىلىملەرنىڭ ئىنتايىن مول ۋە چوڭقۇر ئىكەنلىكىنى، چېكى يوق ئىكەنلىكىنى ھېس قىلغان. بۇلتۇر 10-ئايدا، ما شاۋفېي ب د ت مېھمانلار مەركىزىگە كىرىپ، ئىنگلىز تىلىدا چۈشەندۈرگۈچى بولغان. بىراق، ئۇنىڭ ئارزۇسى كۈنلەرنىڭ بىرىدە خەنزۇچە چۈشەندۈرۈشنى ئاڭلايدىغان ساياھەتچىلەر ئۆمىكىنى باشلاپ، ب د ت نى خەنزۇچە چۈشەندۈرۈش بولغان. شۇڭا ما شاۋفېي بۇ يىل 1-ئايدا مەخسۇس تەربىيەلەنگەن، جۇڭگولۇق خىزمەتداشلىرىنىڭ باھالىشىدىن ئۆتكەندىن كېيىن ئىش ئورنىغا چىقىش سالاھىيىتىگە ئېرىشكەن.

نىيۇيوركقا جايلاشقان ب د ت نىڭ باش ئىشتابىدا، چۈشەندۈرگۈچى ما شاۋفېي (ئالدىدا) ساياھەتچىلەرنى باشلاپ ب د ت نى ئېكسكۇرسىيە قىلدۇرماقتا. (شىنخۇا ئاگېنتلىقى مۇخبىرى لى مۇزى فوتوسى)

بۇ يىل چاغاندا، ما شاۋفېيغا پۇرسەت كەلگەن. بايرام مەزگىلىدە، ب د ت غا كەلگەن جۇڭگولۇق ساياھەتچىلەر شىددەت بىلەن كۆپەيگەن، زىيارەت مەركىزىنىڭ خەنزۇ تىلىدا چۈشەندۈرگۈچىلىرى يېتىشمەي قالغان. شۇنىڭ بىلەن ما شاۋفېي ۋاقىتلىق ئاجرىتىلىپ، خەنزۇ تىلىدا چۈشەندۈرۈشنى ئاڭلايدىغان ساياھەتچىلەرنى يېتەكلەپ، ب د ت يىغىن زالى، خەۋپسىزلىك كېڭىشى، ھەربىي ھازىرلىقلارنى قىسقارتىش كۆرگەزمە زالىنى ئېكسكۇرسىيە قىلدۇرغان، «خەتەرلىك پەيتتە بۇيرۇقنى تاپشۇرۇۋالغان» ما شاۋفېي سىناقتىن ئۆتكەن، جۇڭگولۇق ساياھەتچىلەرنىڭ ئېكسكۇرسىيە قىلىش بېسىق مەزگىلى ئۆتۈپ كەتكەندىن كېيىن، ئۇ داۋاملىق خەنزۇ تىلىدا چۈشەندۈرۈشنى ئاڭلايدىغان ساياھەتچىلەر ئۆمىكىنى يېتەكلىگەن. «مەن ھەر قېتىم خەنزۇچە سۆزلىسەم، ساياھەتچىلەر ھەيران قالىدۇ، بەلكىم ئۇلارغا نىسبەتەن، خەنزۇچە سۆزلەيدىغان چەتئەللىك چۈشەندۈرگۈچىلەر كۆپ ئۇچرىمىسا كېرەك».

نىيۇيوركقا جايلاشقان ب د ت نىڭ باش ئىشتابىدا تارتىلغان چۈشەندۈرگۈچى ما شاۋفېينىڭ سۈرىتى. (شىنخۇا ئاگېنتلىقى مۇخبىرى لى مۇزى فوتوسى)

ما شاۋفېي مۇخبىرغا مۇنداق دېدى: «خەنزۇچە چۈشەندۈرگۈچىنىڭ ئىش ئورنىغا چىقىش سالاھىيىتىگە ئېرىشىشى ئۈچۈن، چۈشەندۈرۈش مەزمۇنىنىڭ خەنزۇچە نۇسخىسىنى پىششىق بىلىپلا قالماي، يەنە جۇڭگونىڭ ب د ت دا ئوينىغان رولى، جارى قىلدۇرغان تەسىر كۈچىنى نۇقتىلىق ئۆگىنىش بىلەن بىللە، جۇڭگولۇق ساياھەتچىلەرنىڭ بەزى ئالاھىدە ئېھتىياجىنى چۈشىنىشكە توغرا كېلىدۇ، مەسىلەن، ئۇلارنىڭ ب د ت غا نىسبەتەن قانداق سوئاللىرى بار، دېگەندەك. بۇنىڭدىن باشقا، بارلىق چۈشەندۈرگۈچىلەر ھەر كۈنى ئېقىم مەسىلىلىرى دوكلاتىنىڭ مەزمۇنىنى ئىگىلىشى كېرەك، مۇشۇنداق قىلغاندىلا ئاندىن ساياھەتچىلەرگە خەۋپسىزلىك كېڭىشى ياكى ئىقتىسادىي-ئىجتىمائىي كېڭەشنىڭ شۇ كۈنى مۇزاكىرە قىلىدىغان قارالمىلىرىنى تونۇشتۇرغىلى بولىدۇ. تەربىيەلىنىشتىن بۇرۇن جۇڭگونىڭ ب د ت دا بۇنداق چوڭ تەسىر كۈچىنىڭ بارلىقىنى بىلمەيتتىم». جۇڭگو تىلغا ئېلىنسا، ما شاۋفېي ئاغزى-ئاغزىغا تەگمەي سۆزلەپ كېتىدۇ. «ھازىر خەۋپسىزلىك كېڭىشىگە دائىمىي ئەزا بەش دۆلەت ئىچىدە، جۇڭگو ئەۋەتكەن تىنچلىق ساقلاش خادىملىرى ئەڭ كۆپ؛ جۇڭگونىڭ ھازىر ب د ت نىڭ ئادەتتىكى خامچوتىغا تۆھپە قوشۇش نىسبىتى ناھايىتى يۇقىرى بولۇپ، % 12كە يېتىدۇ». ما شاۋفېي يەنە ب د ت باش ئىشتابىدا ئۆتكۈزۈۋاتقان «دۇنيا تىنچلىقىنى قوغدايدىغان جۇڭگو ئارمىيەسى» تېمىسىدىكى كۆرگەزمىنى مەخسۇس تىلغا ئالدى، «جۇڭگو ھۆكۈمىتى ئەۋەتكەن تىنچلىق ساقلاش خادىملىرى ھەقىقەتەن ناھايىتى كۆپ، نۇرغۇنلىرى ئافرىقىدا». بۇ «تور چولپىنى» ئىزچىل باشقىلارغا ئوخشىمايدىغان يولدا ماڭىدۇ. ئالىي مەكتەپنى پۈتتۈرگەندىن كېيىن، ئۇ ئامېرىكىنىڭ شەرقىي شىمالىدىكى سەككىز داڭلىق ئالىي مەكتەپنى پۈتتۈرگەن ئوقۇغۇچىلارغا ئوخشاش «كەسپىگە ماس كېلىدىغان» خىزمەت تېپىشقا ئالدىرىمىدى، بەلكى مانخاتتان جۇڭگولۇقلار كوچىسىدا پىيانىنو كۇرسى ئاچتى. 2017-يىلى، دوستلىرىنىڭ تونۇشتۇرۇشى بىلەن، ما شاۋفېي جۇڭگو تارىخىدىكى داڭلىق شەھەر شىئەنگە كېلىپ، چەت ئەلگە ئوقۇشقا چىقىرىدىغان بىر ۋاسىتىچىلىك ئاپپاراتىدا خىزمەت قىلدى. ئۇ چەتئەلدە ئوقۇش ئويى بار جۇڭگولۇق ئوقۇغۇچىلارنى تەربىيەلەش، كېڭەيتىش ۋە مەسلىھەت بېرىشتىن باشقا ۋاقىتلىرىدا يەنە، قوڭغۇراق راۋىقى، دايەن مۇنارى، لەشكەر ۋە ئات ھەيكەللىرى قاتارلىق داڭلىق مەنزىرىلىك جايلارنى ساياھەت قىلىپ، بۇ شەھەردىكى ئالەمشۇمۇل ئۆزگىرىشلەرنى ھېس قىلدى. ما شاۋفېينىڭ ئېيتىشىچە، ئۇ خۇيزۇلار كوچىسىنى ئايلىنىشنى ياخشى كۆرىدىكەن، گۆش مومىسى، ئۆردەك كاۋىپى قاتارلىق ئۇششاق يېمەكلىكلەرنىڭ مەززىلىك تەمى ھازىرغىچە ئۇنىڭ ئېسىدە ئىكەن. ئۇ يەنە شۇ جايدىكى جۇڭگولۇق دوستلىرى بىلەن مۇزىكا ئەترىتى تەشكىللەپ، ھەر چارشەنبە كۈنى كەچتە قوڭغۇراق راۋىقى ئەتراپىدىكى بىر جاز مۇزىكىسى قاۋاقخانىسىغا بېرىپ ئويۇن قويغانىكەن.

نىيۇيوركقا جايلاشقان ب د ت نىڭ باش ئىشتابىدا، چۈشەندۈرگۈچى ما شاۋفېي ساياھەتچىلەرگە ب د ت نى تونۇشتۇرماقتا. (شىنخۇا ئاگېنتلىقى مۇخبىرى لى مۇزى فوتوسى)

گەرچە ما شاۋفېي ساياھەت قىلىشقا، شۇنداقلا مۇزىكا ئەترىتى قۇرۇشقا بەك ئامراق بولسىمۇ، لېكىن ئۇ ئۆزىنى مۇكەممەل كىتابخۇمار ۋە ئۆيگە ئامراق ئەر، دەپ قارايدۇ. ئۇ كىچىكىدىن تارتىپلا بىر قىسىم چۈشىنىكسىز كىتابلارنى تەھلىل قىلىپ ئوقۇشقا قىزىقاتتى، ئەمما تور دەۋرىدە، خەنزۇ تىلى ۋە جۇڭگو مەدەنىيىتىگە بولغان قىزىقىشى تۈپەيلىدىن، ئۇ دائىم جۇڭگونىڭ مەسىلىلەرگە جاۋاب بېرىش سۇپىسى -«جىخۇ»دا ماقالە ئوقۇيدىغان بولدى. «جىخۇ» دا، ما شاۋفېي ئاساسلىقى ئامېرىكا ۋە جۇڭگو جەمئىيىتى ۋە بۇ ئىككىسىنىڭ پەرقى، ئوخشاشلىقى توغرىسىدىكى تېمىغا كۆڭۈل بۆلەتتى، مەسىلەن: «ئامېرىكىدىكى نامراتلار قانداق ياشايدۇ؟»، «ئامېرىكىدىكى داڭلىق مەكتەپ ئوقۇغۇچىلىرى قانداق تىرىشچانلىق كۆرسىتىپ ئوقۇيدۇ؟»، «چەت ئەللىكلەرنىڭ جۇڭگوغا بولغان قاتمال تەسىرى جۇڭگولۇقلارنى ھەيران قالدۇرامدۇ؟»، «چەتئەللىكلەر تاڭ شېئىرلىرىنى چۈشىنەمدۇ؟»، « نېمە ئۈچۈن ئامېرىكىدىكى سېمىز قىزلار جۇڭگودىكى سېمىز قىزلارغا قارىغاندا ئۆزىگە ئىشىنىدۇ؟» دېگەندەك. ئۆزئارا پىكىر ئالماشتۇرۇش جەريانىدا، ئۇ جۇڭگو تور ئەھلىنىڭ ھەقىقىي ئويىنى چۈشىنىپ، كۆزەتكۈچى نۇقتىسىدا تۇرۇپ ئۆزى تەۋە بولغان ئامېرىكا جەمئىيىتى ئۈستىدە پىكىر يۈرگۈزدى. ئۆزىنىڭ تەجرىبىسى بار سوئاللارغا خۇشاللىق بىلەن جاۋاب بەردى. «جىخۇ» تور بېكىتىنى بىر يىل ئارىلاش جەريانىدا ئۇ جەمئىي 50 چە سوئالغا جاۋاب بېرىپ، ئالتە كۆز قاراشنى ئوتتۇرىغا قويدى، توققۇز پارچە ماقالە يازدى، بۇلار «بىز يەھۇدىيلار زادى كىم؟»، «ئامېرىكا ياشلىرىنىڭ جۇڭگوغا بولغان ئىجابىي تەسىرىگە قانداق قاراش كېرەك؟» دېگەن ماقالىلەرنى ئۆز ئىچىگە ئالىدۇ. بۇنىڭ ئىچىدە ئەڭ ئالقىشقا ئېرىشكەن ماقالە 1600 دىن كۆپرەك ئالقىشلانغان، 600 دىن ئارتۇق ئوبزور ئېلان قىلىنغان.
نىيۇيوركقا جايلاشقان ب د ت نىڭ باش ئىشتابىدا تارتىلغان چۈشەندۈرگۈچى ما شاۋفېينىڭ سۈرىتى. (شىنخۇا ئاگېنتلىقى مۇخبىرى لى مۇزى فوتوسى)

 

بۈگۈنكى كۈندە 20 مىڭدىن ئارتۇق ئەگەشكۈچىسى بار ما شاۋفېينى «جىخۇ» تورىنىڭ نوپۇزلۇق ئەزاسى دېيىشكە بولىدۇ. لېكىن ئۇ ئۆزىنىڭ نېمە ئۈچۈن «تور چولپىنى» بولۇپ قالغانلىقى توغرىسىدا توختىلىپ كەمتەرلىك بىلەن مۇنداق دېدى: «مەن چەتئەللىك بولغاچقىلا كۆپچىلىك ماڭا ئەگەشتى». ما شاۋفېينىڭ قارىشىچە، 21-ئەسىردە، جۇڭگو-ئامېرىكا مۇناسىۋىتى، جۇڭگولۇقلار بىلەن چەت ئەللىكلەرنىڭ مۇناسىۋىتى ئىنتايىن مۇھىم ئىكەن. ئۇ ئۆزىنىڭ تىرىشچانلىقى ئارقىلىق جۇڭگولۇقلارغا چەتئەلدىكى تۇرمۇشنى، ئامېرىكىلىقلارغا جۇڭگولۇقلارنىڭ ئويىنى تېخىمۇ ياخشى چۈشەندۈرۈشنى ئۈمىد قىلىدىكەن.

企业微信截图_15667245174513.png
企业微信截图_1566721788743.png
بۇ يىگىت قانداق قىلىپ ب د ت دىكى خەنزۇچە چۈشەندۈرگۈچى بولالىدى؟